வெயிலுக்கு மட்டுமல்ல.. ஹார்ட்டுக்கும் தர்பூசணி ஜில்ஜில்

தர்பூசணி அதிக ரத்த அழுத்தத்தை கட்டுப்படுத்தி, ரத்த ஓட்டத்தை சீராக வைக்கிறது என்று இங்கிலாந்து விஞ்ஞானிகள் கண்டறிந்துள்ளனர். கொளுத்தி எடுக்கும் கோடை வெயிலில் எல்லாரது உச்சி மண்டையும் சுர்ரென்கிறது. இளநீர், நுங்கு போன்றவை அதிகம் விற்பனையாகின்றன. பளிச்சென்ற பச்சை & சிவப்பு கெட்டப்பில் தர்பூசணியும் தெருவுக்கு தெரு குவிந்து கவர்ந்திழுக்கிறது. மொத்த எடையில் 92% தண்ணீர், 6% சர்க்கரை சத்து என்பதால் வெயிலுக்கு மிகவும் உகந்தது. சி வைட்டமினும் அதிகம் இருக்கிறது.
இதில் இருக்கும் கார்போஹைட்ரேட், சர்க்கரை, புரதம், புரோட்டீன், தையமின், ரிபோபிளேவின், கால்சியம் உள்ளிட்டவற்றை உள்ளடக்கி ஒரு மாத்திரையை ஆராய்ச்சியாளர்கள் தயாரித்தனர். உயர் ரத்த அழுத்தம் உள்ள சிலர் ஆய்வுக்காக தேர்ந்தெடுக்கப்பட்டு இரு குரூப்பாக பிரிக்கப்பட்டனர். ஒரு குரூப்பினர் தினமும் ஒரு மாத்திரை சாப்பிட்டனர். 2&வது குரூப்புக்கு டம்மி மாத்திரை கொடுக்கப்பட்டது. 6 வாரங்களுக்கு மாத்திரை கொடுக்கப்பட்டது. ‘தர்பூசணி மாத்திரை’ சாப்பிட்டவர்களின் ரத்த அழுத்தம் படிப்படியாக குறைந்து சீரான நிலையை அடைந்திருந்தது.
‘மாரடைப்பு, ஸ்டிரோக் ஏற்பட மிக முக்கிய காரணம் அதிக ரத்த அழுத்தம்தான். தர்பூசணியில் இருக்கும் பொருட்கள் ரத்த தட்டுகளை அகலப்படுத்துகிறது. இதனால், உடல் முழுவதும் ரத்தத்தை பம்ப் செய்து அனுப்ப வேண்டிய இதயத்தின் வேலை சுலபமாகிறது. வேலை குறைவதால் இதயம் வலுவடைகிறது. எனவே, இதயம் நீண்ட காலம் மக்கர் செய்யாமல் இயங்கும்’ என்கின்றனர் ஆராய்ச்சியாளர்கள்.